· Uxía Paz.
«VI CAMPIONATO DE ESPAÑA DE INVERNO DE LANZAMENTOS LONGOS MENORES»
Esta fin de semana, tocoulles mover ficha @s lanzadores céltic@s no nacional de lanzamentos que se celebrou na pista municipal Gaetà Huguet y Universidad Jaume I en Castellón.
María Pena remataba a súa boa competición cun último intento de 43,59m, colocándose así na 2ª posición do lanzamento de xavelina (600g), sendo prata e cunha magnífica mellor marca persoal. Na mesma proba, Paula Piñón comezaba o seu concurso con tres intentos por riba dos 38m. Finalmente concluiría na 6ª posición cun rexistro de 38,75m. Ademáis, tamén participaría no lanzamento de disco, onde alcanzaría os 34,24m finalizando a súa participación no oitavo posto.
No lanzamento de martelo (6kg), Eric Méndez remataba na 7ª posición facendo un intento válido e catro nulos. Debido a unha caída no inicio do quinto lanzamento, Eric non foi quen de facer o derradeiro intento. Por sorte, Eric non sufriu ningunha lesión importante.
«CAMPIONATO DE FRANCIA DE PISTA CUBERTA»
Tamén esta fin de semana volvería ao tartán a nosa Galaico – Francesa, Alice Finot. Esta vez faríao para competir nos 3000ml no nacional baixo teito da Federación Francesa. Alí tería de novo, unha fantástica prestación, logrando o ouro e parando o crono nos 9:12.33, sendo esta a súa nova MMP. Podemos afirmar, sen medo a trabucarnos, que Alice esta tempada situáse entre as mellores fondistas do continente. Vindeiro obxectivo: Torun.
ACTUACIÓNS DESTACADAS
Xa en Galicia, cabe destacar a actuación de Mateo Rodríguez, quen participou nos 3000ml do Control de Marcas organizado pola FGA e celebrado na cidade do Lérez. Fixo un rexistro de 8:57.85, MMP e situándose entre os mellores da súa categoría no Ránking Nacional. Ademáis, Pedro Vázquez e Juan Núñez nos 800m, volveron a demostrar os seus progresos, mellorando de novo as súas MMP, acreditando 1:57.61 e 1:58.23 respectivamente.
Pola súa banda, Andrea Pais tamén melloraba a súa marca persoal nos 200ml facendo 25.27s no Control de Marcas celebrado en Expourense. Evidenciando a súa recuperación total, tras varios meses no dique seco.
¡Parabéns celtic@s, seguimos sumando!
