A Escola Celta Atletismo nace co propósito de acoller as categorías inferiores do Real Club Celta de Atletismo e do Club Atletismo Femenino Celta. O obxectivo principal é adestrar aos nosos propios atletas dende os seus primeiros pasos no atletismo ata a súa etapa de máximo rendemento deportivo. Apostamos por un proxecto sólido, ben organizado e estruturado, que facilite o traballo dos adestradores e o ensino de todas as disciplinas atléticas, garantindo así unha actividade de alta calidade e competencia.

A nivel organizativo, dividimos aos nenos por categorías, de xeito que as ensinanzas sexan adecuadas a cada etapa de aprendizaxe. Isto tamén permite facilitar a organización das familias, ofrecendo varios grupos e horarios. A nosa actividade competitiva céntrase nas competicións atléticas organizadas pola Fundación Deporte Galego da Xunta de Galicia, pola Federación Galega de Atletismo, e nas diferentes competicións e actividades organizadas pola propia Escola.