A medida que avanzamos neste novo curso escolar, os nosos atletas comezan de novo a competir. Esta pasada fin de semana, numerosos atletas do Clube acudiron ao «Campionato Xunta de Galicia Absoluto, Sub 23 e Sub 20 de Campo a Través por Equipos», celebrado o sábado 7 en Pontevedra.
Nesta ocasión puidemos ver varios triunfos célticos. Pedro Vázquez, impoñeríase na proba Sub-18 masculina, cun tempo de 11´26, nesta mesma proba, o seu compañeiro Mateo Rodríguez, chegaría en terceira posición cun tempo de 11´38. Estas actuacións, sumadas ás dos seus compañeiros Juan Núñez, Sergio Souto, Biruk González e Daniel Antonio Crespo, conseguirían impoñer ao conxunto céltico como Campións Galegos. Na categoría Sub-20 masculina, serían as actuacións de Hugo García, Hugo Suárez, Alex Goberna e Nicolás Arias as que outorgarían unha segunda posición ao tamén equipo celeste.
Uns cantos quilómetros máis ao leste, no Centro de Alto Rendemento de León, puidemos ver á nosa atleta Carlota Salgado acudir á Concentración Sub-18 preparatoria para as competicións internacionais de probas combinadas.
Volvendo á nosa comunidade autónoma. En Vigo, puidemos ver @s nos@s competir en casa na «III Xornada Serie Municipal 2021» onde cabe destacar o novo Record Galego de lanzamento de martelo sub-14 feminino (3Kg) feito pola céltica Marta Hermida.
Parabén a todos@s atletas que competiron esta fin de semana.
